محكمة الأسرة.. شادية: مبيعمرش معايا رجالة الأولاني مات والتاني طفش

تواجدت «شادية» في محكمة الأسرة بعد تجربتين زواج انتهت كل منهم بألم وحسرة وكسرة قلب الزوجة، بعد وفاة زوج «شادية» الأول حاولت البحث عن الاستقرار في حياتها وتزوجت مرة أخرى حتى تحقق حلم البيت والأسرة الذي حرمت منه وأصبحت أرملة وأم وحيدة لأبنائها الاربعة، لكن زواجها الثاني لم يجلب لها سوى التعب، ووصلت الزوجة لهذه النهاية بسبب زوجها الذي ترك نزواته تدمر أسرته.

قصص محكمة الأسرة

قالت «شادية» عن زواجها الأول: «أنا اتجوزت أول مرة وأنا عندي  17 سنة، خلفت منه 4 أولاد، كان راجل كويس ومفيش مشاكل معاه، كان بيصرف عليا وعلى العيال وراجل محترم، طول حياتي معاه كانت طبيعية ولو في مشاكل كانت بتبقى بسبب أهله بس كانت بتعدي والدنيا تمشي، وفجأة جوزي أبو ولادي اتوفى».

حكايات محكمة الأسرة

أكملت «شادية»: «كانت صدمة عليا بعد وفاة جوزي، معرفتش أعمل ايه هو كان بيصونا وبيحمينا، لكن بعد ما مات بقيت لوحدي، عشت عشان اربي عيالي واكون جنبهم، أهله محدش سأل فيا من ساعة وفاة جوزي، لحد ما أهلي غصبوا عليا اتجوز واحد اكبر مني عشان ألاقي حد ياخد باله مني لو حصلهم حاجة، وافقت على كلامهم واتجوزته وخلفت منه ولد.»

دعاوي محكمة الأسرة

تابعت «شادية»: «بعد ما الجواز حصل حقيقته بانت عرفت انه بتاع ستات، بيسبني ويخرج معاهم والستات بقت تجيله البيت وأنا موجودة ومش بيهمه حاجة، فلوسه كلها بيصرفها عليهم ولما أسأله ليه يعمل كده والمفروض فلوسه لبيته وابنه يقولي جارتي وبساعدها، رضيت بالوضع وحاولت معاه كتير أصلح حاله وقالتله اللي بتصرفه على الستات اصرفه على ابنك كان بيرفض ومبيسمعش كلامي.»

قضايا محكمة الأسرة

أضافت «شادية»: « لحد ما فجأة هو اللي سابني سافر وسابني أنا وابني وجاب شقة وضبها وعاش فيها ومعرفش عنه حاجة من ساعتها، لما اتاخر عليا الايجار صاحب الشقة طردني أنا وابني، وقتها رفعت عليه قضية نفقة ولما عرف إني رفعت قضايا طلقني غيابي، طلقني من سنتين، رافعة عليه نفقة و مؤخر ومتعة، خدت عليه أحكام بس مفيش حاجة اتنفذت».