عنتيل مدينة نصر.. محامية ضحايا الصيدلي: عنده هوس بالكاميرات وبيراقب أهل بيته |خاص

التقى موقع الحادثة المحامية دعاء عباس دفاع ضحايا الصيدلي خالد محمد توفيق، المعروف إعلاميًا بـ عنتيل مدينة نصر، والتي كشفت عن مفاجآت تعرض لأول مرة منذ اكتشاف وقائع هتك العرض والتحرش بالسيدات والفتيات داخل إحدى الصيدليات بمدينة نصر.

عنده هوس بالكاميرات وبيراقب أهل بيته 

في البداية، قالت محامية ضحايا الصيدلي عنتيل مدينة نصر: "تلقيت شكوى من سيدة تقول إنها زوجة دكتور صيدلي قام بالتحرش بالأطفال والنساء واستغل جهلهم وفقرهم، وقدمت لي الشكوى مدعومة بفلاشة عليها مقاطع فيديو دلائل على ارتكاب الدكتور الصيدلي الجرائم المنسوبة إليه".

تابعت: "الحياة الزوجية كانت طبيعية جدًا ومكنش في أي مشاكل بينها وبين جوزها، وجدت الفلاشة بالصدفة البحته، شغلت الفلاشة لقت فايل عليه أسماء سيدات وأطفال كاتب على كل مقطع فيديو اسم الضحية زي (جنى الصغيرة)"

ولفتت محامية ضحايا عنتيل مدينة نصر: "كان بيصور بكاميرات ثابتة داخل الصيدلية، وارتكب الجريمة بتاعته، وبعد ما تمشي الضحية بيقعد على جهاز الكمبيوتر ويفرغ المقطع اللي فيه الانتهاك اللي عملها ويحتفظ بيه في ملف له باسورد، لما الزوجة جابت الهارد زوجها المتهم كان لسه مقفلش الملفات دي بباسورد ده كان جزء من اللي قدرت تحصل عليه مش كل الأدلة ضده، الزوجة واجهته وانكر في البداية لكن اعترف انو مرتكبش الجرم كله واستمر في الانكار امام العيلة كلها "

تابعت: "رفعت الزوجة قضية طلاق للضرر وارفقت الفلاشة في محكمة الاسرة وانكر الصيدلي المتهم الاتهامات الموجهة ليه، لكنه اعترف قدام النيابة لأن كان معانا الفلاشة واضحة ومش مفبركة، والجمعية الحقوقية ادتني تقرير صادم من الإذاعة والتلفزيون بفحص الفيديوهات على الفلاشة، وفحص الوقائع اللي فيها، وفي تقرير من خبير يصف الوقائع التي رصدت في الفيديوهات والفيديوهات في الفلاشة سليمة ".

أكملت محامية ضحايا عنتيل مدينة نصر:"تواصلت معي الزوجة لأني رئيس مجلس إدارة الجمعية القانونية لحماية الطفل والأسرة، وليس بصفتي محامية الموضوع تطوعي ولم اخذ عليه اجر "

"الواقعة في عزبه الهجانة في منطقه الغوصة الصيدلية كانت في المكان ده بقالها 13 سنة، المتهم كان عنده تلت صيدليات في الخصوص والهجانة كان بيختار أماكن يقدر منها ويستقطب سيدات معندهاش وعي، ولو حاولت تقاوم مش هتقدر تلجأ للقانون خوفًا من كلام الناس، والأطفال أهلهم غلابة وبيسعوا على أكل عيشهم وميجيش في تصورهم إن ممكن يحصل كده في أطفالهم من الدكتور الصيدلي في مكان أكل عيشه"

وشددت محامية ضحايا عنتيل مدينة نصر: "المتهم انتحل صفه الطبيب، الناس كانت بتسمحله لانهم مش فاهمين هو بيعمل ايه كان بيحط السماعة ف ودنه طول الوقت زي ما وضح في مقاطع الفيديو، بيعمل نفسه بيقيس الضغط وبيتحرش بيهم والتحرش كان بيختلف من السيدات للأطفال في سيدات عدى عليها الموضوع وفي سيدات انتبهت ان في حاجة مش كويسه، بالنسبه للأطفال كان بياخدهم للمكان الخلفي في الصيدلية ويستدرجهم بكلام زي(تعالي يا حبيبتي انتي شكلك تعبانه)، أو قد يكون كان يستقطبهم من خارج الصيدلية كان بيكون واضح في الفيديوهات انو بيستدرجهم وان الضحية جايه موضح لها حاجة غير الحقيقة، بدليل إنه برضه كان حاطط السماعة وبيكشف على الأطفال وبيتحرش بيهم مستغل براءتهم وقله حيلتهم وفقرهم، ده مكنش قياس ضغط احنا بنقول لتوعية الناس مفيش دكتور بيقيس الضغط كده".

واختتمت قائلة: " وحاجة جديدة متقالتش هو كان حاطط كاميرات في كل حته قبل كدة هو كمان كان حاطط كاميرات في بيته 24 كاميرا داخل وخارج البيت بيراقب مراته وولاده، مؤكدة: "تم الحكم للزوجة بالطلاق ضرر والزوج قدم استئناف للحكم لأنه لم يتخذ ضده أي اجراء قانوني رسمي ضد الزوج، والزوجة عملت محضر في قسم القاهرة الجديدة والمحضر اتحول لنيابة القاهرة الجديدة ده كله ثبت في أوراق رسميه وللأسف المحضر اتحفظ ،المحامي اللي كان معاها قدم تظلم ومفيش جديد".