حكاية سيدة استدرجت جارها لممارسة الرذيلة وقـتلته بالسم | فيديو
اتفقت ست وجوزها على قتل شخص في منطقة القلج بالقليوبية، بسبب خلافات قديمة كانت بينهم، وقدرت الست تستدرجه بحيلة شيطانية بالاتفاق مع جوزها، وخلصوا عليه بطريقة متخطرش على بال حد، ورموا الجثة في الترعة.
من فترة حصلت مشادة كلامية بين المجني عليه وست وجوزها، وانتهت المناوشات بينهم بتدخل الناس اللي عملت قعدة صلح واتفق الطرفين على انهاء الخلافات، وان كل واحد يروح في حال سبيله ويسامح، وترجع الأمور لمجاريها، والناس وافقت ومشيت على كدا وخلاص، طبعا دا اللي كان ظاهر لكن النفوس كانت شايلة، لدرجة ان الانتقام وصل للقتل بطريقة بشعة.
سيدة تستدرج جارها لممارسة الرذيلة وتقــتله بالسم
بشعة شهدتها منطقة القلج، حيث أقدمت ربة منزل وزوجها على قتل شخص بالخانكة؛ بسبب خلافات قديمة بينهم، وتم إخطار اللواء نبيل سليم مساعد وزير الداخلية لقطاع أمن القليوبية، وتم نقل الجثة للمستشفى وتحرير المحضر اللازم بالواقعة، وتولت النيابة التحقيق.
الراجل ومراته قعدوا مع بعض والحقد والغل بياكل في قلوبهم، ومش عارفين ازاي ينتقموا من المجني عليه، واتفقوا انهم مش هيسيبوه على وش الدنيا لكن المشكلة في انهم ازاي يستدرجوه ويخلصوا عليه من غير ما حد ياخد باله، ومحدش يشك فيهم، وهنا جه دور الست، اللي فكرت في حيلة شيطانية عشان تنفذ المراد وتستدرجه وتخلص عليه.
الزوجة قالت لجوزها سيب الموضوع دا عليه، كل اللي عليك انك تعمل نفسك مش شايف حاجة، وبدأت تكلم المجني عليه في التليفون، وكلمة من هنا على كلمة من هنا، قدرت انها توقعه في شباكها، وتوهمه انها بتحبه وعاوزه تعمل معاه علاقة غير شرعية، الراجل سلم لها وأمن، وكل دا كان بيحصل تحت سمع ونظر جوزها اللي كان بيبقى قاعد جنبها وهي بتكلم الضحية، اللي وقع في الفخ ومكانش مدي خوانة.
يوم الحادثة اتفقت مع المجني عليه انه يروح لها البيت، وقالت له ان جوزها مش موجود ومش هيجي اليوم كله، وانهم لازم يستغلوا الفرصة دي ويقيموا علاقة مع بعض، وأكدت له انها بتحبه من زمان بس المشاكل اللي بينهم كانت مخلياها مش قادرة تفاتحه في حاجة زي دي، وبما انها على قدر كبير من الجمال قدت انها تغوية وتسيطر على عقله وقلبه، ومشي وراها كانه مسحور.
في المعاد اللي اتفقوا عليه وصل المجني عليه، ولما دخل البيت ملقاش حد، الست كانت اتفقت مع جوزها انه هينزل يقعد على القهوة لحد ماهي تندهله، ولما اطمن ان فعلا جوزها مش موجود ابتدى ياخد راحته في البيت، وهو مش مصدق نفسه، وبعد شوية الست استأذنته ودخلت المطبخ عملت كوباية عصير وحطت فيها سم قاتل للمجني عليه، اللي شرب العصير وهو مش مدي خوانه، لكن بعد دقائق ابتدى مفعول السم يسري في عروقه، وبقى يصرخ من الوجع وهو لسه برده مش عارف ايه اللي بيحصل، الست ندهت على جوزها اللي طلع جري، ولقى المتهم مرمي في الأرض وعمال يتلوى من الوجع، فمسماش عليه وبسرعة حط ايده على رقبته وخنقه لحد ما أتاكد انه مات.
بعد كام يوم واحد من الأهالي ماشي جنب ترعة في منطقة القلج ودي تبع مدينة الخانكة في القليوبية، ولقى جثة شخص عايمة على وش الميه في الترعة، فجري بلغ القسم، وطلع رئيس المباحث ومعاه قوة للمكان ولقوا الجثة راكنه على جنب الترعة، ولما النيابة جت وعاينت الجثة لقت في جيب المجني عليه بطاقته الشخصية، وتم التعرف عليه ومن هنا بدأ فريق البحث في جمع المعلومات عشان خاطر يحددوا مين ورا ارتكاب الجريمة البشعة دي.
ابتدى ظباط المباحث يشوفوا علاقات المجني عليه بجيرانه، وأخر مكالمات وصلت للمتهم، ومين اتصل عليه خلال الفترة الأخيرة، وأكدت التحريات أن اخر مكالمة كانت مع ست من منطقة القلج، وبعدها اختفى المجني عليه، وانه كان بينها وبين الضحية خلافات كتير في الفترة الأخيرة، وبكدا كل الأدلة بتشير لوجود علاقة بين الست دي والجريمة.
اتقبض على الراجل ومراته باعتبارهم المشتبه فيهم الرئيسيين في الجريمة دي، وبدأت التحقيقات معاهم، واعترفوا بارتكاب الجريمة، بسبب خلافات سابقة، وقالت الست إنها استدرجته بحجة إقامة علاقة معاه، وهو صدقها، وأول ما وصل حطت له السم وجوزها كمل عليه وخنقه، وبعد كدا شالوه وحطوه في تروسكيل كانوا مجهزينه وجوزها رماه في الترعة.
القصة كلها ملابسات غريبة، وعلاقات غير شرعية، ودي نهاية السكة الغلط، خلصت حلقتنا انهاردة وخليكم معانا مع قصة جديدة على منصات الحادثة.