منار في دعوى خلع: «سبت له العيال ومشيت عشان مرتبي مش مكفيهم»
8 سنوات من الخلافات والمشكلات المتواصلة بين الزوجين بسبب تكاسل الزوج عن العمل وعدم رغبته في الإنفاق على الزوجة وبناته الاثنتين، ما أدى لتصاعد الخلافات بينهما وطلب الزوجة الطلاق ولكن الزوج رفض ما دفع الزوجة لاختيار طريق القضاء والتخلص من الزوج عديم المسئولية.
أقرأ ايضًا: منال للقاضي: «قلب البيت غرزة ولما اتخانقت معاه اتجوز واحدة تانية تحشش معاه»
"يوم يشتغل وعشرة لأ".. هكذا بدأت منار تروي قصتها للقاضي، مضيفة على عدم التزام الزوج بالعمل وتركه معظم الوقت، وأضافت: «من أول الجواز وهو مبيشتغلش وقاعد في البيت وكل ما ينزل شغل ميكملش أسبوع ويقعد تاني في البيت وأنا بدأت اشتغل أون لاين من البيت عشان أعرف اصرف على البيت».
أضافت منار كيف وصلت لنهاية طريق الصبر: «بعد سنتين من الزواج ربنا رزقني ببنتي مريم والمصاريف زادت علينا ومرتبي مش مكفي مصاريف مريم والبيت وهو برضو مش فارق معاه حاجة ولسة زي ما هو».
زدادت الخلافات بين الزوجين بسبب زيادة المصروفات وتكاسل الزوج وعدم تحمله المسئولية ما دفع الزوجة لطلب الطلاق ولكن الزوج رفض، تابعت منار: «بعد ما لاقيته عاجبه قعدة البيت والمصاريف كتيرة طلبت الطلاق بس هو رفض وناس كتير من صحابي قالولي بلاش تخربي بيتك».
أكملت حديثها قائلة: «خلفت بنتي التانية وقلت يمكن دا يخليه ينزل يشتغل بس برضو مفيش فايدة وأنا المرتب بتاعي مش مكفي أي حاجة ومصاريف البنتين كتير عليا لوحدي خصوصًا بعد ما البنتين كبروا وبدأو يدخلوا حضانة ومدرسة».
أقرأ أيضًا: حب ومأساة بعد الأربعين.. قصة زواج سري انتهي بولد وموت الأم وصراع إثبات نسب
سبت البنتين مع أبوهم
طلبت الزوجة الطلاق مرة ثانية ولكن الزوج صمم على عدم الانفصال في المقابل حسمت الزوجة الأمر وبدأت في إجراءات الخلع من 6 شهور وتركت البنات له في المنزل وذهبت بعيدًا، أكملت منار حديثها وعلى وجهها علامات التأثر: «أخر ما زهقت سبت البنتين مع أبوهم وخدت شقة وروحت أعيش فيها لوحدي عشان مرتبي مش هيكفيهم ويمكن أبوهم يتلحلح وينزل يشتغل عشان خاطر بناته».
أضافت: «كنت بستغرب من الأم اللي بتسيب ولادها كدا وتمشي بس دلوقتي فهمت، لإني سيبتهم عشان مش معايا فلوس أصرف عليهم».
بعد فقدان الزوجة الأمل في صلاح حال الزوج وتحمله المسئولية لجأت لمحكمة الأسرة بالجيزة ورفع دعوى خلع منذ 6 شهور ولا تزال القضية منظورة حتى الآن.