لكل واحدة متجوزة وعاوزة تطلق.. اعرفي حقوقك مع برنامج «ست وراجل»

كتير من الستات ميعرفوش حقوقهم اللى كفلها القانون سواء وهم متجوزين أو بعد الطلاق، وده موضوع حلقتنا النهاردة من برنامج ست وراجل على منصات موقع الحادثة، أهلا بيكم أنا آية مساعد.

في البداية محتاجين ننبه أن الجواز ربنا شرعه بهدف بناء مجتمع سليم ومتماسك، وعشان كدا ربنا حدد واجبات وحقوق الجميع الراجل والست وكمان الأبناء، وكلامنا النهاردة عن حقوق الست والقضايا اللي القانون بيتيح ليها ترفعها في محاكم الأسرة وده مش معناه أبدا تشجيع للستات على هدم مؤسسة الزواج، لكن هو مجرد توعية في حال إن كانت حقوقك مهدرة ومش قادرة تحصلي عليها أو على الحد الأدنى منها تقدري تلجأي للمحكمة. 
طبعا مش القانون بس هو اللى بيحفظ حقوقك كسيدة لكن الشرع قبل القانون نظم كل شئ ولم يترك أي شئ على هوى حد، وحدد حقوق الست أثناء استمرار العلاقة الزوجية، وكمان حدد حقوقها أثناء الطلاق وما بعد الطلاق. 

4 حالات من حق الست تلجأ فيها للقضاء

طبقًا لقانون الأحوال الشخصية اللى معروف باسم قانون الأسرة الجديد هناك 4 حالات من حق الست تلجأ فيها لمحكمة الأسرة وهي متزوجة، أولا في حال تعرضها للتعدي والإيذاء الجسدي من الزوج، تاني حالة لو الزوج طرد الزوجة من مسكن الزوجية، الحالة التالتة اذا الزوج امتنع عن الإنفاق على الزوجة وولادها، رابعًا.. لو الزوجة حامل والزوج امتنع عن تحمل مصاريف الولادة تقدر ترفع عليه قضية مصاريف ولادة ودي بيتم تقديرها حسب دخل الزوج والتزاماته. 
خلونا هنا نقول حاجة مهمة أن الحالات اللى فاتت دي بتخاطب الزوجة قبل قرار الطلاق، لكن لو خدت قرار بالانفصال فيه حالات قانونية تانية.

قضايا بعد الطلاق

طيب بعد الطلاق إيه القضايا اللى ممكن ترفعها الست عشان تسترد حقوقها، هي قضايا كتير لكن الغريب أن مطلوب من الست ترفع كل قضية لوحدها وده اللى بيخلي حبال المحاكم طويلة .

عموما القانون بيحدد للست زي ما قلنا قضايا كتير بعد الطلاق تحفظ بيها حقوقها أولها قضية التمكين من مسكن الزوجية لو حاضنة. 
وبرضو من أوائل القضايا اللى بتضطر ترفعها الست بعد الطلاق مباشرة قضية بالحصول على مؤخر الصداق المثبت فى عقد الزواج أو بشهادة الشهود، وقضية نفقة المتعة اللى بتتقدر بنفقة 24 شهرًا من النفقة الشهرية، غير نفقة العدة اللى بتتقدر بنفقة 3 شهور من النفقة الشهرية، وكمان قضية رد  قائمة المنقولات .

طيب لو الست حاضنة القانون بيضف لها حقوق تانية، زي ما قلنا أولها التمكين من مسكن الزوجية أو أجر مسكن للحضانة، وأجر آخر لها مقابل حضانتها للصغار، وأجر رضاعة، ونفقة للصغار، ومصروفات علاج للصغار، ومصروفات تعليم للصغار، ومصروفات ملابس صيف وشتاء للصغار.