محمود عبدالراضي يكتب: 10 حاجات تخليك تنضم لكلية الشرطة
ظهرت نتيجة الثانوية الأزهرية ونقترب من الإعلان رسميًا عن نتيجة الثانوية العامة 2024، ومع رغبة العديد من الطلاب الناجحين عندهم رغبة في الالتحاق بكلية الشرطة، سنقدم بعض النصائح للتمكن من اجتياز الكشف الطبي.
10 حاجات تخليك تنضم لكلية الشرطة
يعد الكشف من أصعب الاختبارات الطبية التي قد يتعرض لها البعض، وإذا واجه الكثير منا الصعوبة في اجتيازه فإننا سنوضح بعض النصائح التي من شأنها المساعدة في اجتيازه بأمر الله وهي:
1. احرص على نظافتك الشخصية في أيام الكشف.
2 . تقوم حالًا تعمل (تشيك اب) على نفسك، كل حاجة زي أنف وأذن وحنجرة وباطنة وعظام ورمد وركز على الرمد خليه يكشف على قاع العين وعلى مستوي النظر، واطمئن على قلبك واعمل رسم قلب واعمل تحليل زي صورة دم كاملة وسكر ووظائف كبد ووظائف كلي وتحليل بول.
3 . هيتطلب من حضرتك تغسل الأذن قبل الكشف متغسلش أذنك وخلاص؛ خلي الدكتور يشوف ودنك محتاجه غسيل ولا لا عشان في بعض الأحيان غسيل الأذن بيسبب التهابات.
4 . وانتا بتكشف بلاش تجري أو تستعجل في المشي هتلاقيك داخل عيادة القلب ودقات قلبك سريعة هتسقط فامشي براحتك وبلاش توتر طب لو حصل إنك نسيت وجريت واتفاجئت استأذن من الضابط الطبيب اللي معاك وعرفه إنك كنت بتجري برا هيكشف عليك تاني .
5 . في كشف الجلدية بلاش توتر عشان العرق، وانتا داخل امسح ايدك في هدومك بتكون قاعد في الحر وعرقان أو ماسح عرقك بإيدك فالدكتور هيفتكر إن إيدك بتعرق.
6 . في الرمد متحاولش تحفظ العلامات أي اتجاه عشان بتتغير وانتا هتجاوب غلط وهتسقط ركز في العلامات وخد وقتك بس متستعجلش وتقول أي إجابة احنا مش في مسابقه.
7 . اشرب مياه كتير هتنفعك في كشف السونار وهوا بيكشف علي الكلي وفي التحاليل.
8 . وانتا رايح للتحاليل بلاش تلعب رياضه قبلها ب 4 أيام طب ليه ؟ لما حضرتك بتلعب لياقة وتحمل علي نفسك الكبد بيفرز انزيم alt بزياده فبالتالي بيبان إن عندك إنزيمات الكبد عالية وهتسقط بلاش رياضة عشان انزيماتك تكون في الطبيعي (هاااااام جدا).
9. تجنب أكل أو شرب أي عصير يوم التحاليل عشان نسبة السكر حتي لو انتا جاي من الصعيد مش هتموت من الأكل بس لو السكر طلع عالي هتزعل.
10 . وأخيرًا بلاش سهر ونام بدري في اليوم اللي قبل الكشف عشان لما تقوم تبقا فايق وعينك مش حمرا أو تلتهب.
تابع أحدث الأخبار عبر
