"قالولي احنا حكومة".. نص أقوال ضحية عصابة الشرطة المزيفة في عين شمس
حصل موقع "الحادثة" على نص أقوال عامل، قام تشكيل عصابي بسرقة مبالغ مالية من شقته بعد انتحالهم صفة ضباط شرطة بعين شمس، وجاء في نص التحقيقات التي حصل عليها الحادثة كما يلي:
س : ما طبيعة عملك تحديدا؟
ج: أنا شغال كهربائي.
س: ومنذ متى وأنت تباشر ذلك العمل؟
ج: من حوالي 5 سنوات.
س: ما معلوماتك بشأن الواقعة محل التحقيقات؟
ج: اللي حصل أن يوم الواقعة كنت قاعد في المحل وخبط على الباب أفراد معرفهومش وقالولي إنهم ضباط شرطة، وكان معاهم 3 طبنجات ولاسيلكي ، و قالولي إني سارق شقق ومحلات، وطالبوا يفتشوا المكان ولما ملقيوش فيه حاجة فسألوني لو عندى أماكن تانيه عايش فيها فقولتله عندي شقتي في عين شمس فخدوني على هناك؛ ولما وصلنا فضوا المكان و فتحوا الخزنة وحرزوا منها 100 ألف جنيه وذهب عبارة عن 3 غوايش وسلسلتين وعقد وسلسلة كبيرة، وبعد كده قالولي يلا بينا على الأمن العام علشان هنكشف عليك وأخدوني لغاية العباسية؛ وسابوني قبل الميدان بشوية، وبعد كده حد من أهلي بلغ النجدة باللي حصل وبعديها الحكومة جت ناحية البيت وأخدوني علشان يسألوني على اللى حصل، ومن ساعتها وأنا هناك ومعرفش أي حاجة ثاني وده كل اللي حصل.
س: متى وأين حدث ذلك؟
ج: الكلام ده حصل يوم 20 مارس 2024، في حدود الساعة 8 بالليل في شقتي.
س: ما سبب ومناسبة تواجدك بالزمان والمكان سالفي الذكر؟
ج: كنت بعمل شغلي.
س: من كان برفقتك آنذاك؟
ج: كنت لوحدي.
س: ماهي المسروقات تحديدا.. وما قيمتها تحديدا؟
ج: المبالغ المالية عبارة عن 100 ألف جنيه والمشغولات الذهبية عبارة عن 3 غوايش وسلسلتين، وسلسلة كبيرة.
