محكمة الأسرة.. فدوى : طلقني في المطار وسرق عفش بيتى
كانت فدوى في محكمة الأسرة بعد سنين عديدة عاشت فيها حياة طيبة وطبيعية مع زوجها ولم تعلم ابدا أن ستكون هذه نهايتها، كانت حياة فدوى مع زوجها طبيعية حتى تم اختبار علاقاتهم اختبار قوي و ما حدث وقتها دمر اسرتها عندما طلقها الزوج عندما عادت لمصر واوصلها لمحكمة الأسرة في النهاية.
قصص محكمة الأسرة..مسيبتش جوزي في الغربة
قالت «فدوى» في بداية حديثها : «أنا متجوزة من 17 سنة مخلفة من جوزي ولد وبنت ، كنت مسافرة مع جوزي من ساعة ما اتجوزنا برة مصر لأن شغله كان بره مصر، أول ما اتقدملي كنت عارفة انه مسافر ومش هنقعد في مصر ووافقت اني ابعد عن أهلي وقرايبي عشان ابقى معاه ومسيبهوش لوحده في الغربة كان لينا شقة في مصر عشان نبقى نقعد فيها».
حكايات محكمة الأسرة.. كان فيه خلافات بسيطة بيني وبين جوزي
تابعت «فدوى» حديثها قائلة: «الحياة بيني وبين جوزي كانت طبيعية ومفيش مشاكل غير العادية، كانت خلافات بسيطة أنا مكنش ليا حد في الغربة وكنت لوحدي، عشان كدة مكنتش بحب أعمل معاه مشاكل لأن مليش حد غيره في البلد اللي احنا فيها كنت لوحدي».
دعاوي محكمة الأسرة..طلقني وأنا في المطار
أضافت «فدوى»: «لحد من كام شهر تقريبا حصل بيني وبين جوزي مشكلة كبيرة جدا كان خلاص مش عايز يكمل معايا وعايز يسيبني، مكنتش عارفة ايه سبب المشكلة وايه اللي غيره كدة قلت ساعتها ارجع مصر عشان الدنيا تهدى بيني وبينه وكنت وقتها هقعد في بيتي اللي في القاهرة، سافرت فعلا وأول ما رجعت وانا في المطار لقيت جوزي باعتلي رسالة طلقني فيها وبعدها بفترة رجع مصر وبعتلي ورقة طلاقي».
قضايا محكمة الأسرة..جوزي سرق عفشي اللي موضباها
أنهت «فدوى» حديثها قائلة: «لما رجعت مصر لقيت شقتي اللي كنت موضباها فاضية خالص كل العفش اللي فيها اختفى وكل حاجتي اتاخدت، وعرفت ساعتها أن جوزي هو اللي بعت حد يسرق الحاجات من الشقة، ورفعت على جوزي قضية تمكين عشان أعرف أخد حقي اللي خده مني بعد سنين العشرة دي كلها».
