سهام لـ محكمة الأسرة : همجي الضرب عنده كيف
تواجدت سهام على أبواب محكمة الأسرة تبحث عن حل لمشكلتها مع زوجها الذي اتسم طبعه دائما بالقسوة معها ومع أطفالها، وبعد صبر الزوجة لسنين عديدة ومحاولتها أن ينصلح حال زوجها بائت محاولتها العديدة بالفشل وانتهى صبرها واضطرت أن تتوجه لمحكمة الأسرة حتى تجد حريتها التي سرقت منها حتى بعد تركها لزوجها.
قصص محكمة الأسرة..مسألناش على جوزي قبل الجواز
قالت «سهام» في بداية حديثها : «أنا متجوزة من 15 سنة، خلفت من جوزي ولد وبنت، أنا وهو كنا قرايب من بعيد، اتجوزنا بعد ما اتقدملي على طول ومسألناش عليه ولا على أخلاقه ولا على أهله لأن مكنش باين عليه أي حاجة وحشة أول ما اتقدملي».
حكايات محكمة الأسرة. .الضرب والإهانة عنده كل يوم
تابعت «سهام» حديثها قائلة: «المشاكل والخلفات بدأت مع جوزي من زمان كانت من أول الجواز قليلة لكن زادت من بعد الخلفة، استحملت المشاكل وقلت عادي أي اتنين متجوزين فيه بينهم مشاكل وخلافات لكن اللي مقدرتش استحمله هو الضرب والإهانة كنت بتضرب تقريبا كل يوم بسبب ومن غير سبب».
دعاوي محكمة الأسرة..استحملت عشان خاطر ولادي
أضافت «سهام»: «صبرت عليه كتير واتحملته قلت عشان خاطر ولادي ميتبهدلوش ومين هيشلنا أنا مليش حد أقعد عنده ، وقلت يمكن في يوم من الأيام يتعدل لكن اليوم ده للأسف كان مبيجيش، لحد ما فاض بيا الكيل ورحت قعدت عند أمي أنا وولادي وسيبته ورفضت ارجعله تاني ابدا وقلت يمكن لما امشي ونسيب بعض المشاكل تخلص».
قضايا محكمة الأسرة..اتهجم عليا أنا وأمي
أنهت «سهام» حديثها قائلة: «جيت المحكمة عشان أرفع عليه قضية خلع بسبب اللي عملوا معايا، بعدما سيبته بفترة اتهجم على أمي وعليا وضربنا عشان كنت عندها، وخلاني خدت ولادي و سبت المنطقة اللي كنت فيها خالص لأن بيت والدتي كان جنب البيت اللي هو عايش فيه وأنا مكنتش أقدر أفضل عايشة في نفس المنطقة اللي هو عايش فيها بالذات لأنه كان بيبهدلني لو قابلني في الشارع بالصدفة، رفعت القضية لأنه رافض أي حل ودي وأنا عايزة أخلص منه».
