أخبار محكمة الأسرة
سمية لـ محكمة الأسرة : معندوش شخصية وأخته هي اللي ممشياه
كانت سمية على أبواب محكمة الأسرة بسبب أهل زوجها الذي سيطروا على حياتها هي وزوجها وكان رأيهم وكلامهم أمر وجب تنفيذه من سمية، تزوجت سمية وكان حلمها بيت مستقر وحياة طبيعية وأسرة سعيدة وضحت بالكثير منذ زواجها حتى تحقق هذا الحلم، ولكن عندما اكتشفت أن زوجها لا يريد تحمل مسؤولية بيت وأسرة وأهله مسيطرين على قراراته وطبعه قاسي أدركت أن هذه ليست الحياة التي كانت تأمل أن تعيشها ، وكان ذلك سبب تواجدها في محكمة الأسرة.
قصص محكمة الأسرة..شافني وأنا بزور عمتي واتقدملي
قالت «سمية» في بداية حديثها : «أنا متجوزة بقالي 13 سنة ومخلفة من جوزي بنتين، أنا وهو اتجوزنا جواز صالونات هو كان ساكن عند عمتي في الشارع شافني وأنا بزورها في مرة واتقدملي بعدها واتجوزنا، أيام الخطوبة كان باين عليه أنه متأثر بكلام أهله وكل حاجة بيقولوها بيعملها على طول بس وقتها قلت عادي ومفيهاش حاجة ».
حكايات محكمة الأسرة..مشاكل بيت العايلة
تابعت «سمية» حديثها قائلة: «أنا كنت متجوزة في بيت عيلة، ومن ساعة ما اتجوزنا وفيه مشاكل كتير في بيت العيلة، بس كل شوية كنت بعدي واسكت وأقول معلش ومتخربيش بيتك لكن هما كل مادى بيزيدوا وبالذات أخته، كانت تعتبر هي أمه وسبب كل المشاكل اللي بتحصل كانت بتتدخل في حياتنا كتير واللي تقوله عليه لازم نعمله على طول ماشي بشورتها».
دعاوي محكمة الأسرة..معندوش شخصية
أضافت الزوجة: «صبرت عليه كتير عشان بناتي لكن لو كان هو انسان يقدر يحكم بيته من غير تدخل أهله كان ممكن الدنيا تمشي بس هو معندوش شخصية، المشاكل على طول على المصاريف وعلى المعاملة وبيعامل البنات بطريقة مش كويسة وكلامه قدامهم مش كويس، اخر مشكلة حصلت بقوله مينفعش الأسلوب ده قدام البنات اتعصب ومعجبوش الكلام وضربني وطردني كانت تاني مرة يضربني».
قضايا محكمة الأسرة..مش عايز يصرف على بناته
أنهت «سمية» حديثها قائلة: « دلوقتي سايباه ومنفصلين بقالنا سنة، هو مكنش بيصرف واحنا مع بعض عشان يصرف لما سيبته، كل جنيه بطلعوا منه بالمشكلة والخناق مش راضي يدفع أي حاجة ولا مصاريف مدارس ولا حاجة و قالي مش هدفعها بالعند فيكي وده اللي خلاني ارفع قضية نفقة لأنه مش عايز يسأل على البنات ولا ياخدهم عشان ميصرفش عليهم».
تابع أحدث الأخبار عبر
