ازاي تخرج من رمضان مبطل تدخين؟ .. محتاج إرادة قوية وقرار حاسم
المدخنين بيواجهوا مشكلة كبيرة جدا في شهر رمضان بسبب الصيام وانقطاعهم بشكل مفاجئ عن النيكوتين طول النهار، وكتير منهم بيحاول يخرج من الشهر الكريم وهو مبطل السجاير لكن مابيعرفوش.. تابع معانا لآخر الفيديو وأنت هتخرج من رمضان ده مبطل وتبدأ حياة من غير نيكوتين.
لازم تبقى نظرتنا لرمضان "غير النظرة الدينية أكيد" إنه شهر تدرب فيه إنك تبطل التدخين لإننا بنقضي حوالي 16 ساعة من غير أكل وشرب وكافيين وتدخين.. ودي نصيحة الدكتور محمد عبد المجيد استشاري الأمراض الصدرية والمدير الأسبق لمستشفى الصدر في العباسية.. اللي قالنا بردو: لازم نستغل رمضان عشان نتخلص من سموم التدخين لأن أعراض الصيام شبيهة بأعراض الإقلاع عن التدخين زي: الصداع، وسوء المزاج، والعصبية.. فدي فرصة ممكن نستغلها إننا بعد الفطار نوقف التدخين باقي اليوم مش فترة النهار والصيام بس.
خطة الإقلاع عن التدخين محتاجة إرادة قوية وقرار حاسم.. وممكن المدخن بيتبدل العادة السيئة دي بإنه ياكل حلويات زي الكنافة والقطايف وشرب العصاير زي قمر الدين.
ممكن يشغل نفسه طول فترة الليل بعد الفطار بصلاة التراويح وطبعا شرب المياه الكتير مهم للحفاظ على ترطيب الجسم بعد الإفطار ولتخليص الجسم من السموم المتراكمة فيه بسبب التدخين.
طبعا أضرار التدخين من سرطانات بتدمر وتنتشر في معظم أجهزة الجسم.. دي حاجة كلنا عارفينها وحتى شركات السجاير معترفة بيها وبتحط صور بشعة على علب السجاير.. ده غير أسعار السجاير الغالية اللي فلوسها هنتسأل عليه.. المدخنين أكتر فئة عارفة أضرار التدخين مش محتاجين نصايح.
احنا هنحاول نشجع بعض السنة دي على التبرع والصدقات بفلوس التدخين، واستغلال الوقت اللي قبل وبعد الفطار في طاعة الله.. عشان على الأقل نكسب كام سنة من عمرنا نقضيه مع العيلة.
