الزمالك سدد ديونه وجاب فلوس الصفقات منين؟
الزمالك سدد ديونه وجاب فلوس الصفقات منين؟ سؤال مهم ويعتبر أكتر سؤال مطروح الفترة الأخيرة؟
الزمالك من شهور قليلة كان بيعاني من أزمات مالية مش أزمة واحدة، عندك أزمة القيد في الفيفا، وعندك أزمات مستحقات اللعيبة المتأخرة، معظم اللعيبة تقريبا كانوا بيطالبوا بفلوسهم ، وبرغم كل المعاناة دي الزمالك بيفوق ويعمل صفقات بملايين، ويرجع ينافس بقوة في كل البطولات الموسم ده.
بس الحمد لله قرر حسين لبيب الرئيس الحالي لنادي الزمالك، ينهي الجدل ويطلع يجاوب على السؤال، وقال في مداخلة هاتفية في برامج كلمة أخيرة اللي بتقدمه لميس الحديدي على قناة أون، وبرغم إنه حاول يتهرب من السؤال في الأول وقال بهزار كدا جبنا الفلوس من الفراعنة لقينا كنز.
إلا إنه بعد كدا وضح أن النادي نجح في فك إيقاف القيد بعد سداد غرامات بحوالي 2.490 مليون دولار، وده بالإضافة للتعاقد مع 10 صفقات في الميركاتو أو موسم الانتقالات الشتوي الحالي، وقال إن الصفقات الـ 10 لاعبين دول تكلفتهم على النادي أقل بنسبة 70% من 4 لا عيبة تعاقد معاهم النادي قبل كدة.
أما بالنسبة للكلام اللي بيقولوه الناس على السوشيال ميديا، والمبالغة في أسعار اللعيبة، قال الكابتن حسين لبيب إن الناس بتبالغ في الأخبار اللي بتزلها على السوشيال ميديا بخصوص فيمة الصفقات، وإن النادي دفع بس 50 مليون جنيه كاش.. وده يعتبر رقم كويس مقارنة بأرقام شرا اللاعبين في الفترة اللي قبل تولية رئاسة النادي.
طب الـ 50 مليون اللي طلعوا كاش من خزنة نادي الزمالك دول دخلوها إزاي أصلا؟ بردو التساؤل دة جاوب عليه الكابتن حسين لبيب وقال إن محبي نادي الزمالك كتير، وإن فيه لجنة في النادي خاصة بالاستثمارات والتمويل والفترة اللي فاتت مهمتها كانت عمل خطة تمويلية للنادي سواء من فلوس اللي حطها محبي جمهور الزمالك في خزنة النادي أو حتى عن طريق البنوك والتبرعات أو القروض.
ولو ماكنتش متابع صفقات نادي الزمالك الفترة الأخيرة فخليني أقولك، إن النادي استغنى عن 8 لاعيبة وهما: عمرو السيسى، وعبدالله جمعة، وحاتم سكر، وأحمد زكى، ومصطفى شكرى، ومحمد طارق، ومحمد حستم، وكريم عبد الحق.
وجاب مكانهم: عبد الله السعيد من بيراميدز، ومحمد شحاتة من طلائع الجيش، وناصر ماهر من فيوتشر، وأحمد حمدى لاعب مونتريال الكندى، والفلسطينى ياسر حمد، ومهاب ياسر من الداخلية، ومحمد عاطف من طنطا، وزياد كمال من إنبى، والأوغندي موتيابا، وأخر الصفقات كانت عودة سيف فاروق جعفر.
