أحمد طنطاوي .. معارض بالصدفة
أحمد طنطاوي مالوش أي رصيد في المعارضة السياسية، الناس عرفته بس لما طلع وانتقد الريس واتكلم بطريقة مش كويسة، واللجان ساعدت الفيديو بتاعه في الانتشار، وبدأوا يقنعوا الناس انه شخصية معارضة وانه مش بيخاف من حد، بس لما تدور على وجهات نظره في القضايا المجتمعية المطروحة دايما، هتلاقيه بيركز بس على القضايا المشتركة مع تنظيم الإخوان الإرهابي زي رأيه في موضوع ختان الإناث، وهتندهش أكتر لما تعرف إن المعارض الخطير ده أهل دايرته نفسهم الانتخابية ما انتخبهوش في الانتخابات اللي بعدها، ومانجحش في الدورة الأخيرة من انتخابات مجلس النواب.
من لبنان للاتحادية
أثناء ما الدولة بالكامل كانت بتستعد لانتخابات الرئاسة وكل المؤسسات والأحزاب والكوادر السياسية بتجهز نفسها للحدث ده، لقينا حد بيكلمنا من لبنان وبيقولنا انا هاجي مصر أترشح للرئاسة، طيب كان أولى تعمل ده من هنا وتيجي تكلمنا من عندنا مش من برة.. ثم إنت في لبنان بتعمل إيه أصلا، اه بيعمل ماجيستير.. ثانية واحدة دي منحة دراسية كمان، من مين المنحة؟
أكيد الناس اللي معاها فلوس في لبنان ومؤثرة هناك.. مين في لبنان معاهم الحاجتين دول؟ بالظبط حزب الله
طيب مين اللي اداله الجرأة او اقترح عليه الفكرة العظيمة بتاعت انه يخاطب الشعب المصري من لبنان ويقولهم أنا عاوز أبقى رئيسكم، أساتذة الخطابات الدولية والسياسات العابرة للقارات تنظيم الإخوان اللي كان بيشتركوا مع بعض في وجهات النظر لما كان في مصر، واضح ان حكايتهم مكملة من زمان وبيخطط انه ياخد كتلتهم التصويتية اللي مابقتش موجودة في الشارع المصري.
أغبى معارض في التاريخ
هفترض معاك يا سيدي انه معارض حقيقي، طيب يا راجل يا محترم هو في معارض عاوز يبقى رئيس جمهورية مايبقاش عارف قواعد وقوانين الدولة اللي هيبقى رئيسها، تروح تطلع محرر رسمي بدون تصريح من الجهة المصدرة للمحرر ده، واللي بيعتبر ده جريمة رسمية في نفس الدولة اللي انت عاوز تبقى رئيسها، أول القصيدة كفر كدة، امال هتدورها إزاي بعد كدة.
أنا من الحركة المدنية بس هبوظها علشان استفيد
أنا هقول اني ابن الحركة المدنية بس هروح اعملهم مشكلة، واروح اجتماعهم علشان يدعموني في الانتخابات فأقل أدبي واعملهم مشكلة مع الدولة، واتسبب في خلافات بين الناس هناك واخليهم يكرهوني، بس مش مشكلة المهم اني اوصل للي انا عايزه، وكدة كدة انا معايا دعم العراب والأب الروحي للحركة المدنية حمدين صباحي، واللي بيعتبر طنطاوي هو البكري بتاع لبنان وحزب الله.
الخايب التاريخي
الخايب الشعبي المحبوب اللي كان بيلف محافظات مصر يقول للناس انتخبوني كنت تبص على اللي حواليه هما اصلا مجموعة مكتبه اللي شغالين معاه، بس انا قائد شعبي وهكتسح، ورئيس الجمهورية خايف مني وخايف من مواجهتي، يا راجل انت مصدق نفسك..
شكلها مش هتنفع جوة، نشوف سكة برة
لما صاحبنا لقى مفيش سكة جوة والمصريين مش بالعينه ومش طايقينه، قال انا اشوف حالي برة، صحينا الصبح على خبر جواز الخايب الشعبي من سيدة انجليزية، طيب ومصر والمصريين والبلد اللي انت عايز تنقذها، ولا انت لقيت انك عكيت الدنيا في الفترة الأخير فبتروح للغرب يحميك، طيب سؤال هي دي قصة حب ولا توجيه جالك من برة انك تعمل كدة، طيب هو في حد كان عاوز يبقى رئيس جمهورية دولة بحجم مصر، ياخد توجيهاته من برة، عيب والله.
