محكمة الأسرة.. خلود: كنت فاكره الجواز هنا وفرح طلع ضرب وإهانة

تواجدت «خلود» على أبواب محكمة الأسرة وعلى وجهها بان الحسرة و الحزن على حياتها التي تدمرت على يد والدها وعلى يد زوجها، الذي لم يصونوها أو يكونوا لها سند في الدنيا، بسبب تحكمات والد «خلود» وإصراره على زواجها في أسرع وقت، وصلت الزوجة لهذه النهاية في محكمة الأسرة حتى تستطيع أن تحصل على حقوقها وحريتها.

قصص محكمة الأسرة

مثل العديد من الفتيات كان حلم «خلود» بيت وأسرة وأطفال وحياة مستقرة لكن تدمر حلمها في الحصول على حياة طبيعية بسبب والدها وزوجها... بدأت «خلود» رواية حكايتها وقالت:« أنا اتجوزت من سنة واحدة بس وقعدت مع جوزي ٥ شهور وسبته وانا حامل في ابني، كان جواز عن طريق المعارف، اتقدملي وابويا وافق عشان كان عايز يخلص مني، اتجوزنا بعد الخطوبة بوقت صغير اوي كانوا شهرين خطوبة بس تقريبا.»

حكاوي محكمة الأسرة

أكملت «خلود» حديثها: « لما جوزي اتقدملي كنت فرحانة اني هخرج من بيت ابويا واخلص من تحكماته وبهدلته ليا، لكن لما اتجوزت لقيت إن نفس اللي شفته مع ابويا بشوفه من جوزي، ضرب وإهانة وبهدلة على طول ، جوزي كان بيضربني لدرجة انه كان هيموتني.»

حوادث محكمة الأسرة

أضافت «خلود»: «كنت بغضب واسيب البيت كتير واروح اشتكي لأبويا، يقولي جوزك ولازم تستحمليه ويخليني أرجعله، حاولت كتير إني اتحمل جوزي عشان الدنيا تمشي وبيتي ميتخربش و مكنتش عايزة ارجع لأبويا لكن مفيش فايدة، لحد أخر مشكلة هو ضربني وطردني من البيت، ساعتها مشيت ورفضت ارجعله تاني»

قضايا محكمة الأسرة

أنهت «خلود» حديثها متأثرة بما مرت به في حياتها وقالت: «من ساعة ما مشيت أخر مرة هو مسألش في ولا حاول يرجعني، كنت وقتها حامل وهو مشفش ابنه من ساعة ما اتولد ولا بيسأل فيه، وأبويا حاول معايا كتير وبهدلني عشان يخليني ارجعله، لكن لما لقى إن مفيش أمل اني ارجع سكت، ودلوقتي هو اللي بيصرف عليا أنا وابني بس طبعا قصاد كل جنية بهدلة وإهانة، عشان كدة جيت المحكمة عشان ارفع على جوزي قضية نفقة عشان أقدر اصرف على ابني من غير ما حد يذلني.»

تابع أحدث الأخبار عبر