عنده دم.. محمد سلام يعتذر عن موسم الرياض: هكون زي اللي بقتلهم بالظبط
أعلن الفنان محمد سلام (هجرس) الاعتذار عن المشاركة في مسرحية زواج اصطناعي بموسم الرياض، المقرر عرضها يوم 30 أكتوبر الجاري، خلال مقطع فيديو تم نشره على صفحة الفنان محمد سلام على انستجرام، مؤكدا أنه لن يستطيع المشاركة بعمل كوميدي استعراضي أثناء قصف غزة، وسقوط أكثر من 5000 شهيد في أحداث فلسطين الجارية.
وقال محمد سلام في مقطع الفيديو: إن شاء الله هسافر بكره الرياض عشان أعرض مسرحية زواج اصطناعي، والمفروض إنها مسرحية كوميدية وفيها أغاني واستعراضات والمفروض إننا هنعرض إن شاء الله يوم 30 وهنعرض في وسط الأحداث اللي بتحصل في غزة، مش متخيل إني هروح اعمل مسرحية واهزر واغني وارقص واخواتنا في فلسطين عمالين بيتقتلوا ويدبحوا ومفيش حاجة بتحصل، أنا مش هقدر اسافر طبعًا.
الموضوع يهدى في فلسطين في غزة، والناس تدخل
وأوضح محمد سلام بقوله: ليه بقول الكلام ده في آخر لحظة؟، أنا كنت على أمل طول الفترة اللي فاتت، إن الموسم يتلغي أو يتأجل زي ما حصل في مهرجان الجونة والقاهرة أو يحصل إن الموضوع يهدى في فلسطين في غزة، والناس تدخل، ونقدر نعرض، بس مفيش حاجة بتحصل، وتقريبًا فيه ناس عماله تموت لحد دلوقتي ومفيش حاجة بتحصل، فأنا ازاي هروح اعرض والناس بيحصلهم كده في فلسطين.
وأضاف الفنان محمد سلام: سامحوني إذا كان إحساسي أوفر شوية، حاسس إني لو عملت كده، زي اللي بقتلهم بالظبط، إني خذلتهم، مش عارف اعملهم حاجة، كفاية علينا السكوت اللي احنا فيه كلنا، ومفيش حاجة بتحصلهم، مش بس هكون ساكت لا هكون بغني وارقص واللي بيحصل بيحصل في فلسطين، أنا بعتذر جدًا عن إني أشارك في موسم الرياض، والمشكلة إن دلوقتي اللي بيحصل في فلسطين ده، ديه قضية كل مسلم في المقام الأول، والمفروض الواجب على كل المسلمين إنهم يساعدوا إخوانهم في غزة ويحاولوا يقدمولهم أي مساعدة، فأنا دلوقتي مفيش حاجة أقدر اعملها زينا زي ناس كتير دلوقتي، نفسنا نساعد بس للأسف مش قادرين نعملهم حاجة.
اقرأ أيضا
لما ربنا يتوفانا ونتسأل أنت ساعدت اخوك المسلم في فلسطين عملت له إيه؟
وكشف محمد سلام أنه: دلوقتي لما ربنا يتوفانا ونتسأل أنت ساعدت اخوك المسلم في فلسطين عملت له إيه؟ اللي مقدرش يعمل حاجة هيسكت طبعًا، أنا هرد هقول إيه؟ هقول إن في الوقت اللي كان فيه اخواتنا في فلسطين بيضربوا ويموتوا ويدبحوا الاطفال والنساء انا كنت بعمل مسرحية كوميدية وبضحك الناس وبرقص واغني، طبعًا لا مش هقدر اعمل كده، كان عندي أمل الموسم يتبدل أو يتلغي، لكن هو مازال قائم وماليش في إني اتدخل ليه هو قائم، مش هقدر أكون جزء في اللي بيحصل ومش هقدر أشارك في الموسم، والمفروض إننا منكتفيش بالدعاء لأخواتنا في فلسطين، معرفش إيه تاني يحصل، بس ميكونش الدعاء بس.
واختتم محمد سلام بقوله: وحابب قبل ما اقفل اقول اللهم طهر قلبي من النفاق وأعمالي من الرياء، الفيديو ده معمول؛ لأني فعلًا في مشكلة؛ لأني بقالي كتير جدًا مش عارف اسافر ولا اعمل إيه وامبارح كنت قاعد مع فنانين وقالولي سافر ده أكل عيشك وهو فعلًا التمثيل ده رزقي ورزق أولادي واللي بصرف عليه، دلوقتي أنا لو مسافرتش هل هموت من الجوع؟ أكيد لا، بس الناس هي اللي هتموت في غزة، ولو حد هاجمني هيقول بس التمثيل ده رسالة، أنا عارف طبعًا، خصوصا الكوميديا إني اضحك حد واضفي روح البهجة، والمفروض فكرة إن دخول البهجة على قلب حد له أجر، بس السؤال مين اللي احنا محتاجين ندخل البهجة على قلبه دلوقتي مين؟.. شكرًا.
تابع أحدث الأخبار عبر
