اتمسكنت واتمكنت.. رحاب: "كنت فاكراها صاحبتي وقفشتها على سريري مع جوزي"
خيانات ونزوات عانت منها رحاب من بداية الزواج؛ بسبب زوج يتبع شهواته دون مراعاة زوجته وعش الزوجية الذي تسعى فيه الزوجة بمفردها لاستمراره.. في البداية كانت النزوات عابرة لا تتعدى مكالمات الهاتف، ومع مرور الوقت ازدادت الخيانات في التعمق حتى وصلت لعلاقة محرمة، فكانت المفاجأة الكبرى عندما علمت أن صديقتها هي الطرف الآخر والمشترك في الخيانة.
خيانات تعرضت لها رحاب من قبل الزوج الذي ظنته شريك الحياة المخلص، ومنها صديقتها التي اعتبرتها وفية لها ولصداقتهما، استهلت رحاب قصته قائلة: "كان عندي صاحبة عارفاها من الشغل بس ما كانتش قريبة مني أوي، بس بعد الجواز لقيتها بتكلمني كل يوم وكل شوية. وأنا ما جاش في بالي ساعتها إنها على علاقة بجوزي، وبقت أقرب حد لي".
وتابعت: "كنت أنا وهي قريبين أوي، فكنت باحكي لها على المشاكل اللي بيني وبين جوزي، وكانت دايمًا تغلطه وتقعد تسخن بينا لحد ما الخناقة تكبر، كنت باقول عادي، أكيد صاحبتي وخايفة عليا وعلى مصلحتي".
من أول الجواز وأنا باعدي له خياناته اللي ملهاش أول ولا آخر
وتذكرت رحاب أثناء حديثها خياناته المتكررة التي كانت تتغاضى عنها لأنها كانت عابرة، مجرد علاقة على الهاتف لا يوجد شيء أكثر من ذلك، وقالت: "من أول الجواز وهو بيخونني بس كانت حاجات عادية ما فيهاش حاجة، كلها كلام على التليفون ما فيش حاجة أكتر من كدا، كانت بتحصل خناقة كل مرة، ويقول لي خلاص آخر مرة وكنت بصدقه".
أصبح الزوج لا يريد التواجد في المنزل كثيرًا؛ ما أدى لزيادة شك الزوجة، فكانت تتوقع نزوة جديدة من نزواته، ولكنها لم تتصور الذي حدث.. تابعت: "في الأول كان بيخونني بيكلم دي ودي على التليفون وخلاص، بس كان بيبقى قاعد في البيت عادي بس بقى يبات كتير برة، وكل شوية يقول لي عندي شغل ومش هعرف آجي البيت"، وأضافت رحاب: "حسيت الموضوع كبير، بس ما كنتش عارفة أعمل إيه، وما مسكتش حاجة عليه لحد دلوقتي، بس هو كان متغير معايا أوي ومع العيال كمان".
صاحبتي وجوزي على سريري
وأكملت قائلة: "ما احتجتش أعمل حاجة عشان ربنا كشف لي كل حاجة من غير أي مجهود مني، في يوم كنت بايتة عند أهلي، وكان فاكر إني هاقعد كتير هناك، جيت داخلة البيت سمعت صوت ناس في الأوضة، ولما دخلت شفت صاحبتي قاعدة على سريري".
وأنهت قصتها وعلامات الصدمة على وجهها: "ما صدقتش نفسي إن صاحبتي هي اللي قاعدة، ولأول وهلة كنت باحسبها واحدة تانية شبهها، بس للأسف طلعت هي، سبت البيت وأول حاجة عملتها رحت رفعت دعوى خلع".
تابع أحدث الأخبار عبر
