الرئيس السيسى: مستعدون لتقديم حوافز للقطاع الخاص «عشان نوفر 25 مليار دولار من فاتورة الاستيراد»
شاهد الرئيس عبدالفتاح السيسي فيلما تسجيليا يسلط الضوء على الجهود الوطنية في مجال الصناعة وجذب الاستثمارات الصناعية.
وأشار الفيلم إلى أن الدولة المصرية عملت على خطة متكاملة لنقلها من الاستهلاك إلى الإنتاج.
وقال الرئيس عبد الفتاح السيسي: "لما اتكلمنا إن عايزين تكون إيراداتنا تساوي مصروفاتنا كان جزء كبير منها الاهتمام بالصناعة، لكن هل يا ترى الدولة وبنيتها التحتية كانت جاهزة لكدا ولا لأ، زي مثلًا قطاع الكهرباء في 2014 ما كانش جاهز لانطلاقة التنمية الصناعية، وعلشان كدا اهتمينا بالبنية التحتية للكهرباء لأن التنمية الصناعية هي الأمل بالنسبة لنا".
وأضاف الرئيس السيسي خلال تعقيب له بمؤتمر حكاية وطن: "احنا ممكن نقدم حوافز جديدة للقطاع الخاص المصري والأجنبي علشان نوفر 25 مليار دولار من فاتورة الاستيراد وتقليل الضغط على الدولار، الإنفاق بالدولار عبء علي وأنا مثلًا بجيب مشتقات بترولية بالدولار ببيعها بالجنيه ومواد غذائية وخامات بجيبها بالدولار وأبيعها بالجنيه وعلشان كده لازم إيراداتي من الدولار تساوي إنفاقي من الدولار أو تزيد.
واستكمل الرئيس السيسى خلال مؤتمر حكاية وطن: بقول لكل المستثمرين المصريين تعالوا عندنا فرص وبنقدم حوافز تشجع على النجاح وهنقدم تسهيلات لمن يقومون بالتوسع في الصناعات اللي احنا عايزينها زي دعم الضرائب وتسهيلات دعم الصادرات علشان نزود الناتج المحلي وزيادة التشغيل وأيضًا توفير عملة صعبة، عايزين نقنع المستثمرين المصريين والأجانب للعمل ضمن قائمة المشروعات المطروحة والمتوفرة من قبل وزارة الصناعة والتجارة والتي تحمل حوافز وحزم تشجيعية".
وأوضح الرئيس السيسى: احنا كدولة ومستثمرين ومواطنين ورجال أعمال عايزين ننهي الأزمة الاقتصادية في أسرع وقت ممكن واحنا محتاجين وآن الأوان إننا نتحرك بفاعلية لإقناع رجال الأعمال علشان يشتغلوا معانا ونقدر نوفر الـ25 مليار دولار، واحنا دلوقتِ بنخصص أراضي للمستثمرين، وأنشأنا 17 مجمع صناعي وقادرين ننشئ 30 مجمع صناعي جديد لو فيه طلب ودي رخصها هتكون جاهزة لأي مستثمر.
