هجوم ورد عنيف.. القصة كاملة لأزمة أسما شريف منير بعد حلاقة شعرها

انتقادات واسعة طالت أسما شريف منير ووالدها الفنان شريف منير عبر صفحات التواصل الاجتماعي بسبب فيديو حلاقى أسما لشعرها وظهورها في مهرجان القاهرة للدراما مما جعلها تتصدر الترند هي ووالدها ورد شريف منير على منتقديه وفي هذا التقرير يعرض لكم موقع الحادثة القصة من البداية:

أسما شريف منير تحلق شعرها أمام الكاميرا

قبل أيام نشرت أسما شريف منير فيديو عبر حسابها الرسمي بموقع التواصل الاجتماعي انستجرام، ظهرت فيه أثناء قيامها بحلق شعرها على الزيرو، وعلقت عليه: شعري بيقع جامد بقاله فترة ده غير 
إن من كتر العمايل اتحرق وبقي مش صحي».

وأضافت أسما شريف منير: قررت أنفذ قرار كان بقالي كتير أوي نفسي أخده وأبدأ من جديد أحرر نفسي افتح صفحة جديدة حقيقي هو قرار صعب جدا بس حسسني بقوة وتفاؤل رميت ورايا حاجات كتير أوي بمجرد إني شلت شعري قلبي كان بيدق جدا وبعديها حسيت إني مليانة ادرينالين خطوة جريئة ومرعبة بس حاسة ‘ني طالعة منها بدرس».

واختتمت أسما شريف منير تعليقها: عارفة إن في ناس كتير هتهاجمني بس أنا فرق معايا احساسي بالراحة اللي أنا حساها دلوقت عادي هيطول تاني بس الإحساس دا مش هحسه غير مره بكره هتشوفو النتيجة الأخيرة.

رد فعل الجمهور على فيديو حلاقة شعر أسما شريف منير 

فور نشر أسما شريف منير فيديو حلاقة شعرها، اختلفت آراء الجمهور حولها فمنهم من انتقدها ووصفها بأنها تتشبه بالرجال، ومنهم من رأى أن ما فعلته حرية شخصيها لأنها أوضحت أن الهدف من حلاقتها لشعرها العلاج فقط.

رد فعل ابنه أسما شريف منير 

كانت جانب من تعليقات الجمهور يتسائل عن رد فعل ابنه أسما شريف منير عندما رأت والدتها لأول مرة بعد حلاقتها لشرعها، وهذا ما أوضحته أسما في ردها على أحد تعليقات الجمهور، حيث قالت: بنتي قالتلي انتي أكتر حد شجاع أنا شوفته وقالتلي انها فخوره إني قوية.

ظهور أسما شريف منير في مهرجان القاهرة للدراما 

بعد ساعات من نشر الفيديو، شهد مهرجان القاهرة للدراما أول ظهور لـ أسما شريف منير بعد حلاقتها لشعرها، حيث ظهرت بشعرها وهو محلوق ومصبوغ باللون الأشقر، لفتت أسما الأنظار واستطاعت تصدر الترند حيث سجلت جميع الكاميرات المواقع والقنوات لقاءات عديدة معاها لأخد تصريحات عن مظهرها الجديد.
ونفت أسما شريف منير في تصريحات أنها تمر بحالة من الاكتئاب وهي التي دفعتها لحلاقة شعرها، وذكرت نفس السبب المرفق بالفيديو وهو أنها قررت علاج شعرها التالف بحلقه والعناية بالشعر الجديد.

انتقادات واسعة تلاحق أسما شريف منير 

جاءت معظم تعليقات الجمهور على الظهور الأخير لـ اسما شريف منير، تنتقد مظهرها الجديد وتصفها بأنها كاذبة لم تكن تريد معالجة شعرها ولكن هدفها هو تصدر الترند الذي غابت عنه بعد توقف برنامجها مع والدها شريف منير. 

رد أسما شريف منير على منتقديها 

نشرت أسما شريف منير صور لها في المهرجان على صفحاتها الخاصة على منصات التواصل الاجتماعي، وكتبت: حابه أول حاجة شكرا على كل ردود الفعل الوحشة والحلوة كلها سعات مواقف زي دي بتخلي ناس تشوف ناس تانية عاملين إزاي مجرد إنهم بيعبرو عن رأيهم وشكرا لكل الناس اللي كانت خايفة عليا وقلقانة عليا.

وأضافت أسما شريف منير: ممكن بقي أقولكم الحكايه من وجه نظري ببساطه أولا الحكايه جت بالصدفه وكان قرار لحظي ومش ندمانه  ثانيا أنا مش بعمل كده عشان التريند بس كنت عارفة إني هبقى تريند وفي فرق بين عارفه وعايزة ».
وأنهت أسما شريف منير: الجماعة اللي مكبرين الموضوع دا شعري مش شعرك أنا عاجبني شكلي جدا بصراحة شكله جامد ومديني ثقة في نفسي جدا.

رد شريف منير على انتقادات الجمهور لـ ابنته 

نشر شريف منير فديو له على صفحاته الخاصة على السوشيال ميديا ليرد فيه على منتقديه من المتابعين وبدأ الفيديو قائلا: إيه الدوشة والضجة اللي انتو عاملينها دي كل دا عشان بنتي قصت شعرها قدام الكاميرا إيه الغلط اللي هي عملته يعني تصرف عادي جدا مفهوش أي حاجة».

 
وتابع شريف منير: أوعو تفتكرو إني هاجي علي بنتي عشان اكسب رضاكو دي بنتي اللي مليش غيرها وبالمناسبه اللوك عاجبني وبنتي متربية كويس جدا وقبل ماتتكلمو بصو علي نفسكو وعلي عيلتكو وإهدو شوية لأن اللي بنتي عملته مش غلط ومش عيب هي مغلطتش في حد وبنتي عندها 36 سنه وأم وعندها بنوتة وهي مسئولة عن نفسها وأنا مسئول إني احميها.. أسما انتي شكلك حلو جدا واخدتي التريند برافو عليكي وأنا مش مهتم بأي كلام بيتقال عليا وعليها احنا مغلطناش في حد.

رد فعل الجمهور علي رد شريف منير 

لاقي رد فعل شريف منير العديد من الآراء من مؤيدين لتصرفه وقيامه بمسانده ابنته وقيامه بدور الأب السند لبنته ودعمها في اختيارها الحر لشكلها وشعرها وبين معارضين له.

تابع أحدث الأخبار عبر