زوجة للقاضي: سقطني 3 مرات عشان خلفتي كلها بنات
حسناء على مشارف الثلاثينات تقف في كبرياء مكسور لكن في النفس شرخ عميق لامرأة تتداعى وهي على أعتاب نهاية حزينة لقصة زواج اختتم بورقة طلاق وطفلتين ومصير مجهول، وبعد أن غدر بها رجل ظنته السند في الدنيا، وتزوج من أخرى عسى أن تنجب له الولد الذي يحمل به.
«سقطني 3 مرات عشان عايز ولد».. بدأت منال حديثها والدموع تملأ عينيها، مؤكدة على معاملة الزوج المتغيرة لها بعد خلفتها للبنات، أضافت: اتجوزنا صالونات ومكنتش عارفاه في الأول بس كنت شيفاه راجل كويس واتجوزته وخلاص وكان كويس معايا في أول الجواز وبيعاملني بما يرضي االله بس لاقيت كل دا اتغير لما عرف إني حامل في بنت.
اقرأ أيضا
تابعت الزوجة: أضايق في أول مرة ومعاملته اتغيرت معايا شوية بس لما حملت تاني مرة وعرفنا إنها بنت برضو سقطني ومعاملته معايا بقت زي الزفت، حملت تاني بعدها بفترة قصيرة وبرضو سقطني وفي كل مرة يعرف اني حامل في بنت يسقطني بس آخر مرة ربنا ستر وخلفت بنتي التانية".
أقرأ أيضًا: داليا للقاضي: بعد ما استحملته 20 سنة بيشك فيا ويتهمني إني بكلم رجالة
تحول الزوج لشخص أخر بعد خلفة الزوجة للبنات وبدأت الزوجة تشك في وجود امرأة أخرى في حياته ولكن بعد فترة صغيرة أصبح الشك يقينا، أضافت الزوجة: "حسيت إن في واحدة في حياته بس قلت لا أكيد مش هيعمل كدا بس كنت قاعدة في يوم ولقيت حد باعتلي صورة وهو مع واحدة في السرير ولما وريته الصورة قالي دي كنت بخلص لها شغل مش أكتر.
تابعت: لقيته بعد كدا بيبات برا كتير وبيتكلم في التليفون طول الوقت ومسكت قلبت في الموبايل وبيكلم نفس الست ولما واجهته قال لي أنا هتجوزها وهطلقك، مصدقتوش بس فعَلا طلع بيتكلم صح وطلقني".
أكملت الزوجة : بعد ما طلقني بفترة قصيرة عرفت إنه اتجوزها وانها أكبر منه بـ 8 سنين بس هو اتجوزها بس عشان عايز يجيب الولد.
انهت منال : بيقبض 8 آلاف جنيه بس بيروح يصرفهم كلهم على مراته الجديدة وبيرمي لي 500 جنيه أنا والبنتين وكل مرة لما أكلمه يزود الفلوس ميرضاش".
لجأت الزوجة لمحكمة الأسرة بالجيزة ورفع دعوى نفقة ولا تزال القضية منظورة حتى الآن.
أقرأ أيضًا: زوجة في دعوى طلاق للضرر: "دبسني في قروض واداني على قفايا"
تابع أحدث الأخبار عبر
