ملحقتش تفرش السجاد.. قصة زواج استمر 60 يوما وانتهى بمأساة
وقفت سيدة على مشارف الخمسين وعلى وجهها علامات الحزن والندم، بسبب الاختيار الخاطئ الذي أدى لطلاق ابنتها "علياء" غيابيًا بعد شهرين فقط من الزواج، بعد ضربها وإهانتها وطردها بلا أي شيء بسبب عدم رغبة الزوج في زيارتها لأهلها أو التواصل معهم ولو بالهاتف.
أقرأ أيضًا: «عايزني اعمله غدا بـ 20 جنيه».. أميرة للمحكمة: «جوزي عربجي ورفع على ابني مطواة»
"طلقها غيابي وأخد كل حاجتها" هكذا بدأت "أم مؤمن" تسرد قصة ابنتها «علياء» والدموع تملأ عينيها مضيفة: "من ساعة ما اتجوز بنتيي مكنش بيخليها تيجي عندي أو تكلم حد من أخواتها ومنعها حتى تكلمنا في التليفون"، أكملت: «قعدوا 9 شهور خطوبة وكان ملاك وبيتعامل معانا عادي فجأة بعد الجواز لاقيناه واحد تاني وكل ما تيجي عندنا أو عند حد من أخواتها يتخانق معاها ويعمل مشكلة وفي مرة حلف عليها بالطلاق وقالها لو روحتي عند أخوكي أو أختك هتبقى طالق».
طردها بالإسدال
قالت أم مؤمن: «روحت لبنتي في يوم ولاقيتها مضروبة وهدومها متقطعة وأنا مش فاهمة إيه اللي حصل عشان ده كله، دخلت أشوف مالها لاقيت أمه حبستنا في الشقة وقالتلي مش هتنزلي إنتي وبنتك ومش هتاخدي أي حاجة من الشقة ومكنتش راضية تخرجنا ولما ابني جه عشان ياخدنا مرضيش يفتح له الباب حتى».
تصاعدت الأمور بين العائلتين بسبب تصرفات أهل الزوج الغير أخلاقية وأضافت: «زوجي متوفي وعم العيال هو اللي ماسك كل حاجة لعيالي، كلمنا عمها وجه وكنت فاكراه هيقف معانا ويساعد بنت أخوه واستغربت من اللي هو عمله ولاقيته بيقولي خدي بنتك وأمشي ومش هتاخدي حاجة من الشقة»، تابعت: «خدت بنتي وهي بالإسدال ومشيت روحت بيتي واتفاجئت تاني يوم لاقيت جوزها باعتلها ورقة طلاق غيابي».
أقرأ أيضًا: «هان عليه عياله التلاتة» .. سحر: "ماشي ورا أهله وطلقني غيابي"
بعد اتمام الطلاق طلبت أم مؤمن حق ابنتها في «القائمة» ولكن الزوج رفض إعطاء الزوجة أي شئ رغم من أن حالته المادية ميسورة ويعمل دكتور صيدلي، مضيفة «بعد ما طلق بنتي طلبت منه حقها بس هو رفض وقالي مش هدفع حاجة مامته برضو مرضيتش تديلنا حاجة».
أضافت: «رفعت كذا قضية وبقالنا سنتين في المحاكم عشان أخد حق بنتي واتحكم لنا بـ 3 شهور نفقة وأخدنا 20 ألف جنيه المؤخر»، تابعت: "جيت أخد حاجات بنتي لاقيت أمه حارقة السجاد ومبوظة كل حاجة فـ أخدنا 40 ألف جنيه تعويض على الأضرار اللي أمه عملتها في الحاجة».
أنهت أم مؤمن حديثها: حسبي الله ونعم الوكيل فيهم، استلفت 100 ألف جنيه عشان أجوز بنتي ومش عارفة أسدد الديون اللي عليا».
أقرأ أيضًا: خايفة يموت عيالي .. زوجة في دعوى طلاق: حاول يقتلني والمخدرات خلته مسعور
تابع أحدث الأخبار عبر
