لعدم وجود محامٍ.. تأجيل محاكمة المتهم بقتل أمه خنقا بالمطرية للأسبوع القادم
قررت محكمة جنايات القاهرة تأجيل محاكمة المتهم بقتل أمه خنقا، داخل شقتها فى منطقة المطرية، للأسبوع المقبل لحضور محامي المتهم. وكان المتهم تم إيداعه قفص الاتهام، وسأله رئيس المحكمة عن ارتكابه للواقعة، فرد المتهم: أيوه قتلت أمى عشان الجن قال لى اعمل كده، وهى عاملة لى سحر، والمطرية كلها سحر.
وبسؤاله عن وجود محامٍ للدفاع عنه، رد أنه ليس معه محامٍ.
يذكر أن تقرير الطب النفسي أثبت سلامة المتهم وقواه العقلية قبل وأثناء ارتكاب الحادث.
انفراد.. نص تحقيقات النيابة مع المتهم بقتل أمه بالمطرية.. خنقها بإيشارب أثناء نومها
نص التحقيقات مع المتهم بقتل أمه
وحصلت على نص تحقيقات النيابة مع المتهم بقتل والدته في منطقة المطرية أثناء نومها بعدما خنقها بإيشارب، حيث بدأ المحقق بسؤال المتهم:
س: ما تفصيلات إقرارك؟
ج: اللى حصل إن أنا كنت رايح أعمل سنانى، وركب لى دكتور السنان شريحة في سنانى، والشريحة دى متصلة بعصب مخى، وبتسحر وتخلى الناس تقول عليا مجنون، والمطرية دى كلها سحر، وبعدين أول امبارح اللى حصل إني كنت نايم على جنبى الشمال، ومرة واحدة كأن فيه حد بيشيل البطانية من عليا، وفتح عينى، ولقيت نفسى شايف أمى، فأنا كنت محذرها إنى هاموتها، فقمت وقولت لها "موتى – موتى"، وقعدت اضرب فيها بإيدى الاتنين في وقت واحد، وده كان السحر اللى معمول هو اللى خلانى أعمل كده، وبعدين قعدت وقلت "الله يرحمك يا أمى ، الباقى كله هيموت".
وأضاف المتهم في التحقيقات قائلا" أخدت غويشة وخاتم من إيدها وبعدين أخدت الفلوس من الدولاب، وأخدت مفاتيح التوك توك، روحت قولت لأبويا بابا تعالى شوف امى عشان بتنده على أخويا محمد، ونزلت روحت بالتوك توك للدجال وأنا بسميه الدكتور، وساعتها جالى وسواس إن الحكومة جاية؛ لأن أنا لقيت نفسى عامل جريمة، وبعدين الحكومة جت مسكتنى وقولتلهم على اللى حصل".
س: ما مصدر رزقك؟
ج: أنا سائق توك توك.
س"ما طبيعة العلاقة بينكما؟
ج: أنا مش عارف أجاوب بسبب ممكن أقول لك اللى في خيالى أنا علاقتى بيها كانت وحشة.
س: وما سبب ذلك؟
ج: عشان أنا بقول الحقيقة، وهى مكنتش بترضى وتقول لى اسكت.
س: وما مضمون تلك الحقيقة؟
ج: إن فيه أخ شيطانى اسمه محمد عبد المعطى وده أخ بيكرهنى كره العمى.
س: متى قمت بارتكاب الواقعة؟
ج: أنا قتلت أمى امبارح.
س: وما باعثك على قتل المجنى عليها؟
ج: يمكن كانت عاملة ذنب وربنا كان عايزنى اطهرها وأدعى لها طول عمرى.
س: وما الأدوات التي استخدمتها في قتل والدتك؟
ج: انا ضربتها بإيدى وحطيت في بقها إيشارب.
س: وما مدى مقاومة والدتك لك؟
ج: كانت بتحاول تمنعنى كتير، ومكانتش عايزة تموت وكانت بتقول لى هتخش السجن يا فتحى.
أقوال والد المتهم بقتل أمه
وبسؤال والد المتهم وزوج المجنى عليها قال في التحقيقات إن ابنه المتهم قام بحلق شعره، وكان يصلى بصوت عالٍ، ولما سأله عن سبب تغير سلوكه قال له "أنا المهدى المنتظر، وإنه بيطلع الشياطين"، مشيرا إلى أنه يوم الحادث كان المتهم مع أمه في غرفة، بينما كان والده في غرفة أخرى، وفى قرابة الساعة السابعة صباحا دخل عليه ابنه المتهم، وطلب منه النزول معه، واستقل معه التوك توك، ثم أخرج له 9 آلاف جنيه، وقال له "أنا قتلت أمى وريحتها من العذاب، دى كانت عاملالى عمل وعملالك انت كمان".
وأضاف والد المتهم أنه أسرع إلى شقته، ووجد زوجته غارقة في دمائها، فاتصل بابنه الثانى، وقال له "أخوك قتل أمك"، ثم أبلغ قسم شرطة المطرية بالواقعة، وتم القبض على المتهم، وبعرض المتهم على مستشفى الصحة النفسية أفادت في تقريرها أن المتهم لا يوجد لديه في الوقت الحالي ولا وقت الواقعة أى أعراض تدل على وجود اضطراب نفسى.
